Gleðilega hátíð kæru vinir !

Við fjölskyldan hér í Köben óskum ykkar farsældar á komandi ári, með þökk fyrir liðin ár - hafið það gott í Brussell, Egilsstöðum, Akureyri, Selfossi, Mosó og Reykjavík !

Björn Ingi, Hildur og Ísak Helgi.

Gleðileg jól elskurnar

Kveðja, Inga

Sæl öll sömul!

Gaman að heyra fréttir frá Köben og Egilsstöðum.

Frá Brussel eru bæði skemmtilegar og leiðinlegar fréttir. Við erum núna á fullu að undirbúa flutninga aftur heim á Klakann. Munum pakka niður og flytja heim í lok janúar. Enn eru milljón ófrágengir endar eins og íbúð, pössun fyrir Tobba, hvað þá vinna fyrir mig og fleira, það er ekki einu sinni búið að fastsetja flutningadaga eða kaupa flugmiða... en við verðum amk komin áður en Hrafnkell byrjar að vinna 1. feb. Svo mun ég bara fara í það að leita að dagmömmu fyrir Tobba og vinnu handa mér. Ef þið vitið um eitthvað skemmtilegt endilega látið mig vita.

Í miðju flutningaskipulagsstressinu erum við svo að reyna að undirbúa jólin, nema það gengur hálf brösulega. Strákarnir eru búnir að vera meira og minna veikir í nóv og des og ég lítið komist út úr húsi. Fyrst fengum við hlaupabóluna í heimsókn og sú törn tók 3 vikur... svo var ég sloppin út í nokkra daga en þá kom kvef og hálsbólga og annað slíkt. Frá 1. des hef ég varla farið út!!!! Ég er einmitt algjört jólabarn, elska að skipuleggja gjafirnar, fara í leiðangra og kaupa í pakkana, föndra og baka, pakka gjöfunum inn fínt og allskyns dúllerí, að sjálfsögðu með jólatónlistina í botni. En það hefur farið lítið fyrir slíku fyrir þessi jól enda er ég busy að leika hjúkrunarkonu! Og gjöfunum hefur að mestu verið reddað með aðstoð internetsins og amazon!!!

Jamms.... En febrúar verður partý-mánuður!!!!

P.s. Inga, ég skal hjálpa þér að ná þessum skvísum út að borða... okkur tekst það á endanum!!!!

Hæ. Allt hið besta frá Egilsstöðum. Ég hef reyndar 2x reynt að smala stúlkum Kúbufjölskyldunnar + Ágústu, saman þegar ég hef verið að koma í bæjarferð en það hefur ekki tekist. Best að leyfa einhverjum öðrum að taka það að sér næst ;-)

Annars er ég að fara yfirum í jólaskapi. Held það finnist varla jafnmikil þrítug jólastelpa og ég á Íslandi. Þá er ég ekki að meina bakstur og föndur skreytinga og gjafa ( það kann ég ekki). Heldur meira að sitja og lesa með seríur allt í kringum mig, jólate og piparkökur. Skoða uppskriftarbækur og reyna að ákveða hvað ég á að hafa í matinn á aðfangadag því í ár eru fyrstu jólin sem við verðum heima. Bara við. Og ég get ekki beðið.

Svo verður flogið til Reykjavíkur þann 3. í jólum og viku eytt hjá tengdó.

Þá er kominn janúar 2008 og ekki hægt að segja að það sé minn mánuður. Uppáhaldsmánuðurinn búinn og ekkert nema snjóbylur, kuldi og rútína tekur við. Mér fannst svo leiðinlegt á Egilsstöðum í Janúar og febrúar í fyrra að það munaði engu að ég pakkaði niður og flytti út í heim. Núna verða gerðar ráðstafanir svo það gerist ekki aftur.

Gaman að heyra fréttir frá Köben. Til hamingju með prófin og gangi þér vel með rest.

Hæ Hæ kæru vinir, ekkert að gerast á blogginu okkar :( Skrýtið, en svona er þetta stundum, lítið að frétta og ekkert að segja frá.

Langaði aðeins að láta heyra frá mér í Köben, styttist í jólin og veðrið svona la-la, þó örugglega skömminni skárri en á Íslandinu, þar sem hefur verið kalt, snjór og bylur skv. netinu ;)

Við fjölskyldan erum búin að færa okkur um setur og vorum að flytja síðustu helgi á mun betri stað hér í Köben. Nær skólanum mínum, matvöruverslun hér við hornið, strætó og lestarstöð nánast beint fyrir utan, þannig að við erum á frábærum stað hér í Köbenn, í Fredriksberg fyrir þá sem eru kunnugir borginni, Borups Allé heitir gatan og er íbúðin bara ansi flott og kósý !

Ég er búinn í tveimur kúrsum og prófin gengu bara vel, annað mjög vel og hitt ansi vel - mjög sáttur miðað við fyrstu prófin, og þau munnleg í þokkabót, fyrstu prófin í um 6-7 ár, danirnir ekkert hrifnir af skriflegum prófum, vilja bara drífa þetta af og spjalla í 15-20 mín og málið er dautt !! Er byrjaður í tveimur nýjum kúrsum sem standa yfir fram í lok janúar og þá aftur munnleg próf í þeim, ansi skemmtilegir áfangar reyndar og lýst vel á framhaldið.

Hvað er annars að frétta af ykkur kæru vinir, endilega látið heyra í ykkur, einhverjar fréttir eru góðar fréttir :) Væri gaman ef maður frétti af hitting, partý eða matarboði hjá þó hluta hópsins þannig að "fjölskyldan" væri ekki dauð úr öllum æðum ! Eða sumarbústaðaferð, þær voru nú alltaf frekar skemmtilegar, vel veitt af mat, drykk og öðrum veigum... gaman saman.

Kveðja frá CPH, Björn Ingi.

Okkar maður loksins heiðraður, eins og hann á svo sannarlega skilið !

http://www.happynews.com/news/10172007/ricky-martin-gets-walk-fame-star.htm Livin'la vida loca: http://www.youtube.com/watch?v=HlKocJWE5S4

Kveðja fra Köben.... BIE.

Sælir kæru vinir, langt síðan maður hefur látið vita af sér. Köben er það núna, netið orðið virkt og skólinn byrjaði í lok ágúst. Við fjölskyldan svona rétt að verða búin að koma okkur fyrir. Ísak Helgi litla ljósið okkur stækkar, farinn að skríða á fullu, allir á iði, stekur strákur - eitthvað að flýta sér við allt :) Gaman að því, yndislegur. Tíminn líður hratt og námið á fullu, verkefnin hlaðast upp og styttist í fyrstu prófin. Hérna er árinu skipt upp í fjórar annir þannig að fyrstu lokapróf eru í lok okt. Svo taka við nýir kúrsar. Var í Malmö í dag, við fjögur í einum hópnum, hópaverkefni, skutumst yfir til Svíþjóðar að skoða nokkra staði þar í tengslum við eitt verkefnið. Ekkert mál, lestirnar ganga á 20 mín fresti ! Áhugavert nám og rétt að byrja, líst vel á og hlakka til með framhaldið. Þroskandi að fara aftur í nám, læra upp á nýtt, læra að læra, spennandi - útlönd heilla, en Ísland samt líka, öðruvísi að fylgjast með svona í gegnum netið, að ofan, úr fjarlægð, ekkert að gerast en samt alltaf eitthvað, Yoko ono, Ringo star að kveikja á friðarsúlu, í beinni í Danmörku á tv-2, gaman að því, Villi Vill að halda ræðu í rokinu, allir að frjósa, Ringo gat ekki beðið eftir að komast inn og á barinn !

Erfitt en samt spennandi að verá í landi og borg sem maður kann ekki utan af, mental-mappið samt orðið nokkuð klárt og leiðin í skólann alltaf sú sama. Öðru hvoru breytir maður til og fer nýja leið. Ekkert mál, borgin ekki eins stór og virðist í fyrstu, kortið blekkir - maður hjólar og eftir stutta stund er maður kominn á leiðarenda. Hér fer maður allt á hjóli, labbandi eða í lest. Bíllinn er bull. Bíllinn er vesen. Vorum á bíl hér fyrstu 10 dagana og satt best að segja var maður feginn að skila Hertz bílaleigubílnum inn. Umferðin er ekki skemmtileg, hún er leiðinleg, hún er vesen, maður fer hægt yfir og hjólin taka fram úr. Þau eiga réttinn, alltaf að líta til hægri, ef ekki keyrir maður á hjól, það væri ekki spenanndi, bara vesen, vesen eru slæm og ekki til framdráttar ;)

Inga mín, innilega til hamingju með brúðkaupið, hrikalega hefði verið gaman að slást í för með kúbuliðinu og djamma, samfagna og skála ! Ég trúi varla að 10 ár séu liðin, tíminn líður, við eldumst (samt ekki) - allir hafa það gott, við búum á mismuandi stöðum, Kaupmannahöfn, Brussell, Egilsstaðir, Akureyri, Selfoss, Mosó og Reykjavík - svo lík öll en samt svo fjarlæg :) Svona er lífið, gaman að þessu.... við höfum hitting e-h tímann þar sem við öll getum hist, það væri frábært og tímabært, kemur að því - ekkert liggur á, við erum ung (þó þrítug og rúmlega séum), ung í anda og líkama... komin með börn og burur, erfingja, stelpur, strákar, sum gift önnur ógift, allt í gangi. Öll við góða heilsu, skemmtileg og sæt... hvað er mikilvægara, ég bara spyr ?

Eins og Inga nefndi man ég eins og það hefði gerst í gær þegar við sátum í aðalbyggingu HÍ hjá Önnu Dóru Sæþórs, og vorum að kynnast, fyrstu tímarnir, stressandi, hvað á maður að gera, hvað á maður að segja, hvað er maður að gera í landafræði... hvað er landafræði annars? Á maður eitthvað sameiginlegt með þessu fólki, hvað er ég að gera hér ????? hehe, skrýtið, svo er þetta bara gaman, skemmtilegt fólk, áhugavert nám, skemmtilegur félagsskapur, frábærar námsferðir, fólk kynnist, fer að þekkjast, kúbufjölskyldan verður til... gæti það verið betra síðan, dinnerar, djamm, pottapartý, bústaðarferðir, ekki slæmt eftir 10 ár. Eins og Inga nefndi þá á örugglega ekki eins mikið eftir að gerast á næstu 1o árum og þeim 10 síðustu. Hver veit samt.

Kæru vinir, langaði að bara aðeins að láta frétta af mér og mínum, bið að heilsa ykkur öllum, verið dugleg að skrifa, hittast, spjalla, láta vita af ykkur og ykkar högum, alltaf gaman að fylgjast með að utan, heiman hvaðan sem er. MSN er sniðugt, bið að heilsa, gangi ykkur öllum sem best, kv. BIE :)

Gaman að heyra frá ykkur :)
Það eru semsagt 10 ár ..hmm.... mér finnst líka langt síðan. Er búin að eiga 2 krakka, búa í Danmörku, taka masterspróf, gifta mig, flytja átta sinnum, heimsækja ca 75 vatnshæðarmæla, borða krókódíl, kaupa mér hús og jeppa, tala næstum því kínversku og fara í meira en 50 parý með ykkur.
Við ættum að halda uppá að við hittumst fyrir 10 árum, borða mat og dansa :) Eruð þið með hugmyndir um hvar og hvenær er best að hittast? Reyna að ná sem flestum. Það er svo gaman.

ég er greinilega alltof löt við að skrifa hérna inn því að ég gleymi alltaf passwordinu mínu. Þetta er náttúrulega ekki hægt.

Allt fínt að frétta af mér, náði öllum prófum í sumarkúrsunum og er bara á fullu að vinna, læra og hugsa um heimilið. Engar stórfréttir á ferðinni á þessum bæ.

Inga, til hamingju með afmælið á morgun (er það ekki rétt hjá mér). Mér líst rosalega vel á að hittast öll sem fyrst.

Það eru 10 ár síðan ég flutti til Reykjavíkur og fór í háskólann en mér finnst vera heil eilífð síðan. Þá var ég 19 ára og var að skríða í þrítugsaldurinn eftir nokkra daga. Í dag er ég 29 ára og er að skríða inn í fertugsaldurinn eftir nokkra daga. Þetta eru búin að vera frekar merkileg 10 ár því mér finnst ég vera búin að afreka heil ósköp. Ég efast um að ég eigi nokkurn tíman eftir að afreka eins mikið á jafn stuttum tíma.

Miðað við hvað ég man lítið eftir því sem ég lærði í háskólanum, þá er merkilegt hvað ég man vel eftir því þegar ég sá ykkur fyrst, hvert og eitt. Enda löngu búin að gera mér grein fyrir því að starfsmannamál henta mér betur en landfræðin.

Mér finnst þetta gott tilefni til að hittast: 10 ár síðan við kynntumst og ég er að verða þrítug? (Sorrý þið sem eigið líka afmæli í kring, ég er bara svo sjálfhverf og ég nenni ekki að fletta afmælisdögum upp í þjóðskrá - læt ykkur bara vita af mínum).

það er orðið alltof langt síðan ég dansaði í stofunni......................

Hehe, allar sögur úr brúðkaupinu hljóma ekkert smá skemmtilega.

Inga, fall er fararheill... en svona litlar uppákomur krydda nú bara athöfnina.

Og einhvern vegin kemur mér ekkert á óvart að talsmenn Kúbufamilíunnar hafi djammað manna lengst... sé einhvern vegin alveg fyrir mér Stebbu/Mörtu sitjandi á tröppunum drekkandi rauðvín af stút þegar allir hinir voru að fara..... humm....

Hlakka til að sjá fleiri myndir ;-)

Ég get sko alveg lofað ykkur að ég verð búin að færa mig yfir á Klakann innan árs, sakna ykkar svo voðalega mikið!!!!
Og ég hef verið að dusta rykið af kokteilabókunum... Síðan sólin lét sjá sig aftur í Brussel og myntuplantan mín dafnar svo vel í garðinum, hef ég verið að kokka upp killer-mojitos í fordrykk út á terrössu! Algjör sæla!!! Svo kokteila-uppskriftirnar hafa ekkert gleymst....

Við skemmtum okkur konunglega í brúðkaupinu hjá Frú Ingibjörgu. Hún sjálf var auðvitað alveg æði eins og þið sjáið á myndinni.
Við Marta vorum ekki neitt æði í flugvélinni daginn eftir, frekar grænar í framan og flugvélin hristist alltof mikið.
Þetta var alveg frábært sveitabrúðkaup og Inga og Halli eiga æðislega fjölskyldu og vini (VIÐ auðvitað samt alltaf best).
Böddi, þú ert vonandi búinn að koma þér vel fyrir í Köben!
Mér líst vel á hitting 7.september þegar Lille Bro mætir á landið, eruð þið til?
Svo ætla ég rétt að vona að Bjössi hafi tekið framúr öllum í maraþoninu og Hildur hafi rúllað upp prófinu. Vonandi er Eddie búinn að ná sér eftir skrallið á okkur kerlingunum. En við erum svosem að ná heilsu aftur, þannig að Ella....þú þarft að ryfja upp úr kokteilabókinni þinni og flytja heim til Íslands aftur.

Ég stal þessarri af síðunni hans Tryggva. Ég er varla neina mynd búin að sjá nema þær sem eru þar svo þetta verður að duga í bili. Það bjargar myndinni að Eddie reyndi að komast inn..........

Elsku Inga!

Innilega til hamingju með giftinguna, daginn og allt saman!

Þú mátt alveg smella eins og einni mynd inn af ykkur HJÓNUNUM!!!

Elsku bestu vinir.

Mig langar að senda ykkur mínar kærustu kveðjur og þakka fyrir gjöfina til okkar HJÓNANNA. Þið eruð endalaust yndisleg og ég hefði svo sannarlega viljað hafa ykkur öll þarna, þó Stebba, Marta og Eddie hafi á stórkostlegan hátt haldið heiðri ykkar uppi!

Brúðkaupið gekk nánast því áfallalaust fyrir sig. Í kirkjunni steig Rakel á kjólinn minn nokkrum sinnum á meðan ég labbaði inn, hún neitaði að rétta okkur hringana, ég kom ekki hringnum á Halla, ég gleymdi næstum því að kyssa hann og hann faðmaði mig svo fast að slörið datt af :-) Þannig að skemmtiatriðin byrjuðu strax í kirkjunni, en það var nú bara gaman og kom okkur og kirkjugestum til að brosa :-) Eins gott að maður er ekki þessi perfect týpa..........

Svo var fordrykkur á Laufási, allir í rútu upp í sveit að borða og dansa. Krúttin mín í Kúbufjölskyldunni sögðu nokkur orð sem mér þótti ofsalega vænt um ......... Ég held að Marta, Stebba og Eddie hafi öll skemmt sér vel eins og ég. Allavega var einhver að spyrja mig í gær hver það hefði verið sem sat í tröppunum og þambaði rauðvín af stút: "Örugglega Stebba eða Marta".

Ástarþakkir fyrir alltsaman þið öllsömul!
.... tóku þið ekki einhverjar myndir af okkur öllum saman? Þær verða þá að fara hérna inn. ... Bjössi, geiturnar koma með Landflutningum í næstu viku...... nokkrar feitar enda mikill kvenkostur á ferð.

Sæl kæru vinir!

Gaman að sjá einhverja hreyfingu hér inni, veit svo sem að ég hef ekki verið mannanna best í þeim efnum.

Til hamingju með framhaldsnámið Böddi og Inga, til lukku með tilvonandi brúðkaup Inga og hamingjuóskir til þín Marta með að klára masterinn!!! Alltaf nóg að gera hjá Kúbufjölskyldunni.

Ég segi allt fínt, búin að vera í löngu sumarfríi, fyrst 2 vikur í S-Frakklandi, í risastóru húsi í Rónardalnum, innan um sólblóm og vínvið. Lágum þar í leti í sólinni. Höfðum svo smá viðkomu í rigningunni í Brussel áður en við komum hingað á Klakann. Erum nýkomin aftur í siðmenninguna eftir vikudvöl á Hornströndum. Höfðum alla familíuna með norður, ömmur og afa, systkini mín og svo guttana tvo og höfðum það náðugt. Fengum að vísu 1 og hálfan sólarhring í vitlaust veður svo það var varla fært út úr húsi. En það gekk yfir og þá tók bara blíðan við, íslenskt sól og sumar í flíspeysu og ullarfötum :-D

Eftir nokkra daga í siðmenningunni og 1 brúðkaup á laugardaginn höldum við svo aftur heim á leið.

En fyrst Böddi er á leið til Köben, hvað með Kúbumót í Köben??? Anyone???

Sælir kæru vinir, nú styttist í Danmörk hjá okkur litlu fjöskyldunni... búin að vera á Ísafirði í nánast allt sumar fyrir utan stuttar bæjarferðir 2x í sumar. Fljótt að líða, blíðan búin að vera einstök og þægilegt umhverfi, andrúmsloft og tíðarfar. Sá litli dafnar vel og stutt í brosið eins og sést á myndinni, meira um hann á síðunni hans :)

Ég komst inn í skólann sem ég sótti um og hef mastersnám í landslagsarkitektúr 27.ágúst nk. Við förum út 13. ágúst og fáum íbúðina þann 15.ágúst. Heimilsfangið er Peter Holmsvej 4, rétt hjá Islands brygge og Fiskitorvet mollinu fyrir þá sem eru kunnir Köben. Stutt á strikið, um 4 km og ég er um 3 km í skólann.

Marta, innilega til hamingju með áfangann um daginn, gaman að klára masterinn - hefði viljað koma í veisluna en var því miður hér fyrir vestan í blíðunni. Inga, til hamingju bráðum með gifitnguna, væntanlegt framhaldsnám og vona svo sannarlega að giftingardagurinn verði skemmtilegur fyrir þig og þína :) Eddi, hvað er málið að banna 18-23 ára að fá ekki að gista á tjaldstæðinu á Akureyri um versló ;) nei segi svona, þú ert flottur ! B.T. gaman að sjá þig hér fyrir vestan fyrr í sumar, gangi þér vel, bíð enn eftir innflutningspartýinu sem er sennilega löngu búið heheheheh..... kæru vinir, haldið áfram að skrifa á síðuna og látið vita af ykkur, ég mun allavega fylgjast með að utan og halda áfram að blogga svo lengi sem síðan verður eitthvað virk.

Stebba, Hildur, Ella, væri gaman að heyra meira frá ykkur og frétta.... svo ef þið verðið öll eða í sitt hvoru lagi í Köben þá látið þið að sjálfsögðu heyra í ykkur og við hittumst í dinner, á barnum eða hvar sem er, hvenær sem er. BIÐ AÐ HEILSA, kv. Böddi.

p.s. Er reyndar á landinu 6-10. sept í giftingu hjá bróður mínum 8.sept, stuttur hittingur fös 7.sept ??

Jæja... búin að vera í korter að reyna að muna lykilorð og password.

Ég er komin til vinnu aftur eftir gott sumarfrí. Ég er ein á efri hæð Landsbankans og búin að vera síðustu 2 vikur. Ég var frekar lengi að koma mér í gang, starði út um gluggann, tiplaði fingrunum í borðið og vorkenndi sjálfri mér að vera alein í vinnunni. En eftir að hafa tileinkað mér margumtalaðar tímastjórnunaraðferðir er allt að gerast. Hef komið þvílíku drasli í verk á notime.

Sumarið á Egilsstöðum er ekki komið ennþá. Rigning og kuldi og ég vorkenni hjólreiðafólkinu með sultardropana sem kemur bara inn í bankann til að fá sér heitt kaffi. Kannski að ég baki eitthvað í kvöld og laumi við hliðina á kaffikönnunni á morgun. Það hlýtur að kæta.

Það er svo sem margt framundan hjá mér. Sumt má ég ekki blaðra hér en mér er óhætt að segja að ég er að fara að gifta mig í ágúst, ég er að byrja í mastersnámi í mannauðsstjórnun í HÍ, einhverjar breytingar eru framundan í vinnu og svo hef ég einsett mér að vera enn skemmtilegri næsta vetur en þann síðasta - hvernig sem það er nú hægt....

Klukkan orðin 12:00 sem þýðir að sá tími sem ég gaf mér í þessi skrif er liðinn.
Fariði nú að segja einhverjar fréttir.
Kv, ungfrú Ingibjörg

Til hamingju með daginn stelpur.

Jiminn. Það er ýmislegt að gerast.
Til hamingju með þetta allt saman! Nafnið, vinnuuppsögn, Ísafjörð, fæðingarorlof, DK og landslagsarkitekt. Er ekki málið að Kúbufjölskyldan fari í verslunar/bjór - ferð til Bödda og co? Sveitin er æði.

Sælar elskurnar, nóg að skrifa um hjá mér í þetta skiptið. Er búinn að vera á leiðinni að skrifa en búið að vera svo brjálað að gera. Við fjölskyldan erum búin að skíra litla drenginn okkar og fékk hann nafnið Ísak Helgi :) meira á síðunni hans á barnalandi nr. 59373.

Einnig erum við búin að selja ofan af okkur í Grafarvoginum og flutt til Ísafjarðar (tímabundið í sumar hjá tengdó), þar sem við erum að fara til Danmerkur í haust, Kaupmannahöfn. Ég er að fara í nám í landslagsarkitektúr ef ég kemst inn (á frekar von á því en hitt, fæ svar loks í byrjun júli), ef ekki - þá fer ég í Kort- og landmælingatækni í KTS. Spennandi tímar framundan og vonandi ef einhver er í Köben að hann hafi samband, alveg gistipláss í íbúðinni fyrir áhugasama :)

Ég hætti í vinnunni, hjá skipulags- og byggingarsviði 31.maí sl., eða reyndar hætti ég ekki formlega fyrr en um miðjan des. þar sem ég er núna í sumarfríi og fer svo í framhald af því í fæðingarorlof, sniðugt þetta fæðingarorlof - gott að geta nýtt sér þetta svona vel :)

Þessi maí mánuður og síðustu mánaðarmót voru alveg klikk, skírðum Ísak Helga 19.maí, losuðum íbúðina 30.maí og fórum til Köben í smá ferðalag 1. - 8. júní og svo gistum við hjá pabba mínum í Rvk. í nokkrar nætur og fórum svo í beinu framhaldi nánast af Köben ferðinni til Ísafjarðar og veðrum þar í sumar :) Loksins komin í ró og næði og sá litli fílar það alveg í tætlur, voða góður og sprækur - sveitin er fín, ég held ég sé smá sveitamaður í mér !

Erum búin að redda okkur flottri íbúð rétt hjá Islands brygge svæðinu sem er nokkuð nálægt centrum Köben, Strikinu og því svæði, og svo er innan við 3 km í skólann minn. Við förum út 15.ágúst.

Sæl öll

Óskaplega hef ég verið latur í skriftum undanfarið. Böddi innilega til hamingju með strákinn, flottur gæi. Annars er allt gott að frétta, stjórn landfræðinga stefnir enn ótrauð að landsyfirráðum með kúbufjölskylduna innanborðs. Það var mikið stuð hjá okkur á ArcÍs ráðstefnunni, en eins og myndin að neðan ber með sér mætti Lilli aumingi galvaskur.

Sjáið hvað hann er flottur!!!!! Við beyglurnar og hann vorum saman á fundi og svo svaka dinner um kveldið á föstudaginn. Þvílíkt stuð :) tókum nokkrar myndir og þessi var flottust. Ætlið þið ekki öll að koma á föstudaginn og fagna nýrri stjórn? skylst að hún sé prídd eðalfólki :)

sjáumst þá:)

Sæl kæru vinir, takk fyrir kveðjurnar og heillaóskir :)

Þetta eru sannarlega viðbrigði að hafa ekki endalausan tíma fyrir sjálfan sig og geta gert það sem mann langar, þegar mann langar til (eins og þið öll þekkjið) - hins vegar er sá litli endalaus uppspretta gleði og maður bíður spenntur eftir fyrsta brosinu, fyrsta þessu og hinu... ég er enn í fæðingarorlofi og nóg að gera alla daga við já litla, hann þarf sitt, svolítið óvær búinn að vera yfir daginn og stundum á kvöldin en sefur sem betur fer vel yfir næturnar, sem bjargar okkur alveg. Jæja bið að heilsa í bili og endilega halda áfram að skrifa á síðuna skemmtilegar frétir, eða bara góðan brandara eða mataruppskrift, eða bara hvað eina sem ykkur dettur í hug - hittumst vonandi fyrr en síðar !

Til hamingju bæði tvö með stóran og myndarlegan dreng!
Ég mun fylgjast með heimasíðunni ykkar :-)

Til hamingju Böddi og Hildur.
Vá hvað þetta er sætur kútur, og stór!! Og frábært að allt gekk svona glymrandi vel.
Ég sé á myndunum að það er svipur frá pabbanum :)

Til Hamingju með STORA strákinn .. :) hvernig er svo upplifunin að vera orðin Pabbi?? vona að þið hafið það gott :)
Ég er að skella mér í gögnutúr á morgun til spánar í 2 vikur! ætlun er að fá endurnæringu í sálina fyrir lokasprett ritgerðarinnar sem á að skylast 1 juni! skála fyrir ykkur í einhverju sveitaþorpinu :)

Til hamingju með strákinn Böddi! Ekkert smá sætur!!!

Njótið sem best þessara fyrstu daga og mánuða, þessi kríli eru ekkert smá fljót að stækka!!!

Til hamingju með prinsinn Böddi og Hildur. Ekkert smá fallegur strákur.

Sælt veri fólkið,

jæja það kom að því. Okkur Hildi fæddist kraftimikill drengur sl. fimmtudag 22. mars kl. 17:59, tæpir 17 merkur og 54 cm. Þið getið lesið meira í vefdagbókinni á barnaland síðunni okkar, tengill hér til hliðar, og skoðað myndir. Lykilorðið inn á læstar síður er helga.

Drengurinn er búinn að vera voða góður síðan við komum heim í gær og sefur og drekkur til skiptis nýbökuðum foreldrum sínum til mikillar gleði.

Hæ.
Ligg í flensu og leiðist meira en nokkru sinni fyrr. Sólin skín samt á Egilsstöðum og ég horfi löngunaraugum upp í fjall því mig langar svo á gönguskíðin mín. Við tökum landsbyggðarlífið með trompi á fyrsta ári. Erum búin að fjárfesta í snjósleða og báti ( sumar- og vetrarhoppý), Halli kominn í Roundtable og ég í matarklúbb, kaffihúsaklúbb og saumaklúbb. Mér var meira að segja boðið í örtrefjatuskukynningu í vikunni sem ég að sjálfsögðu afþakkaði ( fólk er ekki alveg búið að kynnast mér nógu vel).

Ég óska ykkur öllum til hamingju með allt ykkar! Börn, vinnur, skólar, ný útlit á heimasíðum og utanlandsferðir. Glæsileg afrek á stuttum tíma.

Svo ef þið hafið áhuga á að flytja á Austurlandið, þá eru þið velkomin á kynningu á Austurlandi á Nordica næsta laugardag frá 12-16. Ég verð þar að kynna Þekkingarnetið og gæti jafnvel boðið ykkur súkkulaðimola .......

Jiiii minn, ég sé þetta fyrir mér, BT og Roy vopnaðir vélsögum á móti Gunnari Birgis... Bardagi ársins!!!!

Til lukku með nýja jobbið BT!!

Hildur, ég kalla þig multitasking, nám, vinna og barnauppeldi!!! Gangi þér vel...

Böddi, ég segi það sama og Stebba, ég vona að krílið láti ekki bíða of lengi eftir sér, sérstaklega Hildar vegna. Sem betur fer kom Tobbi viku of snemma, og ég var farin að bíða þá! 2. apríl hljómar samt vel plús það er til siðs í þessari familíu að deila afmælisdögum!!!

Hlakka til að sjá þig á morgun Stebba... en því miður er veðrið aðeins að stríða okkur, bakkaði aðeins út úr vorinu. Við fengum t.d. snjó í gær (það snjóaði í 5 mínútur)!!! En það er frekar kalt núna, miðað við síðustu viku og spáin lofar engu nema rigningu. Hva, við innipúkumst bara meira í staðin og ég fæ að heyra sögur frá Kína!!!

Hvað með ykkur hin, eruð þið horfin???

Jæja Lilli, vonandi lætur krílið ekki bíða lengi eftir sér.
2.apríl er samt mjög góður dagur, en þá á Halldór minn afmæli. Hann er að verða 7 ára, trúið þið því!!! Muniði þegar ég var ólétt á 3.ári, jessús minn, það er svo stutt síðan.

Ég var að koma frá Kína, þvílíkt skemmtileg ferð að ég er alveg í skýjunum. Þetta var soldið lík ferð og Kúbuferðin, því þetta var námsferð hjá MBA náminu hans Snorra. Við fórum í fyrirtæki og fengum fyrirlestra um hitt og þetta í Kína. En mér tókst nokkrum sinnum að skrópa í skólanum og væflast um hverfin og fara á markaðina. En það er algjört bisness nám útaf fyrir sig, því að maður þarf að prútta brjálæðislega.
Það var samt gott að koma heim og finna 2 litla menn sem ráða sér ekki úr gleði að fá mömmu aftur.
En þessi mamma er frekar erfið og þarf að fara til Brussel á morgun á ráðstefnu um vatnatilskipun Evrópu. Að sjálfsögðu mun ég vera hjá Ellu og hef vonandi meiri tími núna en síðast til að skreppa í bæinn. Miðað við bloggið hjá Ellu, þá er komið vor í Brussel. Ekki slæmt, því að heima hjá mér í Grafarholtinu í morgun var norðan næðingur og skafrenningur.

Hvað ætlar fólk að gera um páskana?

Daddy, til hamingju með nýja starfið, það veitir ekki af öflugum mönnum í skógræktina á Íslandi. Sérstaklega ef Gunnar Birgisson ætlar að halda áfram að láta svona. Þá þarft þú bara að mæta honum með vélsögina góðu og taka Roy með þér.

Góða kvöldið, flottar breytingar Ella... líst vel á :)

Já lítið verið bloggað að undanförnu, allir að taka sig á... börnin stækka og sum eru ekkert að flýta sér í heiminn, já Hildur mín er komin fram yfir - áttum að eiga í gær 18. mars, skv. upphaflega planinu en það er allt bara rólegt þannig að þá er bara að bíða, og taka einn dag í einu, allavega í síðasta lagi 2. apríl !

Lét hlekk á síðuna (hér til hægri) inn á síðuna okkar sem við uppfærum vonandi fljótlega :)

hæ gæs...

Mér leiddist (lesist: nenni ekkert að gera af öllu hinu sem ég á að vera að gera) svo ég uppfærði bloggið okkar, breytti um útlit og lagaði linkana. Rosa flott!!! Ef þið eigið fleiri heimasíður endilega henda þeim inn (eða sendið linkana og ég bæti þeim við)!!!

Hvað er að frétta annars? Allir dauðir???

Halló

Rosalega erum við öll orðin löt að blogga hér. Af mér er allt fínt að frétta, nóg að gera í vinnu, skóla og ala upp krakkana. Mér finnst ekkert smá gaman að vera byrjuð í skóla aftur en næ samt ekki að sinna náminu alveg nógu vel en vonandi fer ég að vera duglegri. Vinnan gengur fínt, var með 2 verðlaunahafa á Stóru upplestrarkeppninni um daginn svo eitthvað er ég að gera rétt þar.

Læt fylgja með myndir af krökkunum mínum, fyrir áhugasama þá var ég loksins að setja inn myndir á barnaland aftur.

Hei og hó ólympíukandídatar og aðrir eitthvað-datar!! Hvað er að frétta af vesturvígstöðvunum???

Hvernig væri að taka smá föstudagsdroll fyrir framan tölvuna og láta heyra í sér!!

Héðan af meginlandinu er allt gott að frétta, vor í lofti og almenn skemmtilegheit eftir langa og stranga veikindatörn. Er hvorki byrjuð í íþróttum né námi og prísa mig sæla! Ætla bara að njóta veðurblíðunnar í sumar og leggjast í ferðalög, svona til að byggja sig upp og undirbúa sig andlega undir flutninga á Klakann næsta vetur....

Ciao í bili... og koma svo, láta heyra í sér!!!

Það má líka setja inn myndir... Eins og þessa, tekna af mér og litla krílinu í stuttu fríi í Ardenna "fjöllunum", vorum þarna að koma úr "svaka" hellaferð, allt upplýst, steinsteyptir stígar og stigar, og svo endað með smá bátsferð og fallbyssuskoti! Eitthvað annað en hellaferðin góða með augnlækninum um árið þegar við þurftum að skríða á maganum til að komast út!!!

Já gaman að heyra frá fyrstu Ólympíukandidötunum fyrir Pekingleikana. Annars er ég að skipta um vinnu, er að fara til Rannsóknarstöðvar Skógræktar ríkisins að Mógilsá. Verð engu að síður með starfsaðstöðu á Keldnaholti. Er semsagt sérfræðingur í landupplýsingakerfum við þessa ágætu stofnun. Mikið felt og mikið gaman í sumar.

Jæja, Lilli bara kominn með skúbbið. Jú jú við kella erum að slá í gegn, og erum byrjaðar að læra kínversku til að geta bjargað okkur í Peking 2008.
Ni hao.
Annars fór gamla án mín til Akureyrar að æfa fyrir vetrarólympíuleikana. Slær í gegn allsstaðar.

sælt veri fólkið, samkvæmt óstaðfestum orðrómi frá mjög óáreiðanlegum aðila þá eru stebba og marta að meika það "feitt" í skvassinu þessa dagana og stefna ótrauðar á kvennalandsliðið og sæti í skvasslandsliði íslands á ólympíuleikunum í Peking 2008 !

annars, hvað segist... nú bíður minn bara spenntur eftir 18. mars, tæpar 6 vikur í væntanlegan erfingja :)

já hótelið í Brussel kemur sterkt inn ef maður leggur leið sína þangað e-h tímann.... 5 stjörnur og "all-inclusive", getur ekki klikkað ! Púrtvín á ég eftir að smakka, hef alltaf fundist það frekar kellingalegur drykkur, en sama er sagt um Bailey's sem ég fíla alveg ágætlega... go stebba go marta, kína kallar 2008 peking - no pain no gain, you can do it - adriaannnn (rocky balboa).

Ég mæli sko með lúxuxhótelinu á Rue Kelle í Brussel, mjög gaman að vera þar. Mæli með öllum vínunum og matnum, alveg hreint ljómandi. Þetta var nokkurskonar húsmæðraorlof nema að fundurinn var ansi strembinn. Ég er að reyna að skilja Vatnatilskipun Evrópusambandsins og hvernig við getum framkvæmt hana á Íslandi. Ég geri ekki ráð fyrir að skilja nokkurntíman hvers vegna íslensk stjórnvöld reyna endalaust að telja okkur trú um að hér sé allt í lagi og við þurfum ekki tilskipanir um umhverfisvernd, en það er annað mál og sem betur fer ekki mitt djobb.

Mér líst mjög vel á að við setjum hér inn allt um mat og vín.
Ég get sagt frá því að ég keypti mína fyrstu púrtvínsflösku í fríhöfninni. Ég hef alltaf keypt Baccardi þegar ég fer í gegn, en gleymi því að mér er svo sjaldan boðið í partý og ef ég mæti með flösku í partý, þá klárast hún aldrei. Sökum aldurs ákvað ég því að kaupa eitthvað annað, og lét vaða á púrtvínið. Ég fékk svo góða púrtvínssósu um jólin. Ég bjó til púrtvínssósu með lambakjöti á föstudaginn, það virkar mjög vel. Svo hafði ég heyrt að það væri voða gott að sjússa sig á púrtvíni eftir matinn, en sem betur fer fannst mér það vont, þannig að ég held að ég sé bara ekki orðin svo gömul. Mig langaði samt ekki í Cuba Libre, þannig að kannski er ég heldur ekki ung lengur.

Líst vel á þessa hugmynd Böddi... við endum á því að gera bloggið að matar og vínbloggi!!!

Maður ætti nú alveg að geta sett inn punkta um vín og mat reglulega... við Brusselhjónin höfum þvílíkt gaman að því að kokka og sötra vín með... að vísu er 95% af öllu víni sem fæst hér franskt, sem er ekki reyndin heima, þannig að ég veit ekki hvernig ykkur gengur að finna það en það má alveg láta vaða.

Annars skilaði ég Stebbu frænku í lest í morgun, hún er búin að vera hér í Brusslu í 2 daga. Kom sér í vinnuhóp á vegum Evrópuráðsins og verður því reglulegur gestur hér í Brusslu. Við að sjálfsögðu notuðum tækifærið og heltum í hana voða góðu víni (Vosne-Romanée 2003 frá Gros Frère et Soeur fyrir ykkur vínspekúlantana) og gáfum henni steik! Yfir steikinni kom það svo í ljós að við erum giftar inn í sömu ættina, Snorri og Hrafnkell eru náskyldir, og synir okkar því frændur!!! Við munum því ekki aðeins hittast í Kúbudjammi næstu áratugina heldur líka í jólaboðum!!!!

Þar sem þetta er nú blogg um allt... þá finnst mér hafa vantað smá tillögur frá okkur um mat og vín :) eitthvað vorum að ræða þetta í sumarbústaðnum sl. haust að benda hvort á öðru á eitthvað sem við höfum prófað og fílum.

Í dag bendi ég á gott vín frá Ástralíu sem ég prófaði með jólasteiknni, sem var rjúpa að þessu sinni. Lýsing frá www.vinbud.is: Tempus Two Vine Vale Shiraz. Dökkrúbínrautt. Mjúk meðalfylling, þurrt, ferskt, þroskuð tannín með þéttum hindberja og skógarberjakeim.

Það kostar reyndar slatta í ríkinu, 1.800 kr en það er alveg þess virði með góðum mat, gef þessu 86 af 100.

Það verður áhugavert að fylgjast með þróun mála á Kúbu á næstunni. Var að lesa þetta um grey kallinn hann Castro á BBC vefnum.

Gleðilegt ár :) Takk fyrir ÖLL gömlu og góðu ;) eg er greinilega slugsinn hér inni á blogginu þarf að fara að taka mig á :)

Gleðilegt ár öll saman

Já árin líða svo sannarlega, 10 ár frá HÍ, 20 ár frá útskrift grunnskóla, 30 ár... nei ekki meir!!
Líst vel á brjálað partí með öllu genginu.

Gleðilegt árið elskurnar og takk fyrir þau gömlu!!!!

Vonandi gerði ég ykkur engan óleik með þessari uppfærslu á Bloggernum. Ég er hins vegar búin að lenda í þvílíkri vitleysu með Brusselbloggið mitt og hef ekkert getað póstað!

Vonandi höfðuð þið það sem best yfir hátíðarnar. Við nutum þess í botn að vera á Klakanum en maður var orðinn heldur þreyttur undir það síðasta, stöðugar heimsóknir og boð. Maður mátti ekkert vera að því að slappa af!!! En nú erum við komin aftur "heim" til Belgíu, í hversdaginn og smá afslöppun, amk til að byrja með.

10 ár frá byrjun landafræðináms... svalt! Ég er reyndar búin með Ó mæ god, ég er að verða gömul pakkann í bili. Árið áður en ég fór í landafræðina var ég úti í Montpellier og hópurinn sem var með mér þar og hefur hisst síðan hélt einmitt upp á 10 ára afmælið nú um jólin! Allir komu með myndir svo það var nóg af ó mæ god mómentum þar!!!

En ég legg til að við hóum öllum gömlu landfræðinemunum saman í brjálað partý þegar kemur að 10 ára útskriftarafmæli!!!!

Gleðilega nýja árið kæra kúbu-fjölskylda ! takk fyrir skemmtilegar samverustundir á árinu 2006.... sjáumst vonandi fljótlega öll hress og ligeglad ! Brátt verða 10 ár liðin síðan við hófum okkar nám í HÍ-landafræði, pælið í því ;)