Hæ hæ, 

gaman að heyra frá ykkur, velkomin "heim" Ella, þ.e. til Íslands :)

Býst við fleiri partýum, kúbu-kokkteilakvöldum, sumarbústaðaferðum og skemmtilegum uppákomum, 10 ára partýið verður fljótt 15 ára.... landsbyggðar"pakkið" verður aðeins að fara taka sig á, eða höfuðborgarsvæðisliðið að skreppa út í sveit !

Skemmtilega vetrarveðrið á klakanum búið að vera hefur maður lesið um á netinu, ekkert nema lægðir, ófærð og snjór... hér i Köben er bara nokkuð rólegt og þægilegt, 7-9 gráður og voða einhæft veður eftir frekar kalda desember og janúar. 

Búinn í prófum, sem gengu nokkuð vel og allt á áætlun enn... kominn í "dönskukúrs" í skólanum þannig að núna verður maður að fara taka dönskuna vel í gegn ef maður ætlar að komast í gegnum hann. Fjallar um kenningar og aðferðarfræði í landslagsarkitektúr, virkar nokkuð nettur við fyrstu sýn, verkefnavinna komin á fullt, 10 íslendingar í sama kúrs og próf í byrjun apríl.

Til hamingju með kennarann Hildur, örugglega gaman að kenna skemmtilegu fólki, unglingum og krökkum.... sömuleiðis Stebba gaman að flytja, maður á örugglega eftir að kíkja i eitthvað partýið, kúbukvöldið á næstu árum í Árbænum ;)

Med venlig hilsen, BIE.

Hæ.
Til hamingju Hildur :-)
Ég er alltaf á vonlausum tímum í RVK, yfirleitt í miðri viku í 2-3 daga. Þannig að bústaðadjamm eða partý verða án mín. Annars er lítið planað hjá mér. Lífið er svo afslappað þessa dagana að ég nenni ekki plönum. Ætla í fyrsta skipti á ævinni að njóta rólegheitanna í stað þess að fylla skedjúalið þannig að það rjúki út um eyrun. Svona er gott að búa á Egilsstöðum...
En ef þið eruð einhverntíman til í kaffihús eða út að borða í miðri viku ( eða jafnvel á föstudegi) þá er ég til.
Kveðja, Inga

Hæhæ
Velkomin heim Ella :) Já ég er sko líka til í hitting, vil samt ekki lofa neinu á meðan færðin er svona. Lenti í svo hrikalegu veðri um daginn að ég keyri sko ekki í hverju sem er eftir það. Alger skræfa, ég veit! En mig langar orðið alveg hrikalega til að hitta ykkur, alltof alltof langt síðan. Er líka með bullandi samviskubit yfir að hafa klikkað svona svakalega þegar Inga var að reyna að smala okkur saman svo að nú verð ég að standa mig!

Ég er búin með Kennó og get því bæði titlað mig sem grunnskólakennara og framhaldsskólakennara, ekkert smá ánægð með það. Ég er líka alveg að fíla mig í kennarahlutverkinu, dauðlangar reyndar til að prófa að kenna í Fjölbraut en finnst bekkurinn sem ég er með núna svo æðislegur að ég veit ekki hvort ég tími að sleppa honum strax. Ég er s.s. að kenna 8.bekk í Barnaskólanum á Eyrarb. og Stokks., sama bekk og ég var með í fyrra. Svo að fyrst að lærdómurinn er búin þá sit ég bara og föndra á kvöldin (dettur stundum í hug hryllingssögurnar hennar Mörtu frá Ólafsvík). Mér finnst reyndar hrikalega gaman að föndra svo ég er mjög sátt með þetta :)

Allavega, hlakka til að hitta ykkur aftur, og hvernig var það, var ekki pæling um að hittast öll sem vorum í landafræðinni, svona af því að það eru 10 ár síðan við kynntumst?

Gaman að frétta af ykkur. Velkomin heim Ella!
Ársfundur félags landfræðinga verður haldinn þann 28.feb, þið mætið öll.. ekkert múður.
Þeir sem eru ekki í félaginu komast í félagið með hraði í gegnum klíku (sendið mér, BT eða Eddie póst með kt ofl).
Stjórn FL er að skipuð óvenjulega skemmtilegu fólki, þessvegna verður þetta óvenjulega skemmtilegt kvöld og þið fáið að borða og drekka.
Svo var kerlingargreyið líka að heimta kúbuparty... verð að segja að við erum orðnar DESPERATE.
Dagsetningu frá ykkur landsbyggðafólki sem fyrst. Hvenær komist þið í bæinn í partý eða í sumarbústað með okkur?

Svo eru fréttir af mér, ég var að flytja í Reykás 33 um helgina, er á fullu að mála og græja allt mögulegt og er að tapa mér yfir því öllu. Halldór skipti um skóla með viðeigandi veseni og svo er klikkað að gera í vinnunni. Ég ætla þessvegna að stinga af til útlanda í frí um leið og ég sé nokkurn sjens á því. En fyrst vil ég kúbuparty og þamba mojiot með ykkur.

Gleðilegt árið elskurnar mínar!!!!
(Samkvæmt belgískum "reglum" má maður senda áramótakveðjurnar alveg til loka janúar)

Þá er maður kominn aftur á Klakann, í orðsins fyllstu! Snjór snjór snjór og aftur snjór!

Ég er svona rétt að lenda og ná áttum. Við tókum fyrstu dagana í afslöppun og n.k. frí því foreldrar mínir hafa bæði verið heima og getað hjálpað með strákana. En nú eru allir komnir í vinnu aftur og Kjartan byrjaður í leikskólanum, svo það er víst ekki seinna vænna að komast í gír, finna dagmömmu og vinnu!!!!!
Ég held samt að ég lendi ekki alveg fyrr en búslóðin okkar er komin og við flutt inn í "okkar" íbúð! Þá fyrst byrjar alvaran aftur...

En vonandi sé ég ykkur nú flest sem fyrst. Hvenær eigum við að hafa næsta Kúbukvöld????

Velkomin heim Ella!

Gleðilega hátíð kæru vinir !

Við fjölskyldan hér í Köben óskum ykkar farsældar á komandi ári, með þökk fyrir liðin ár - hafið það gott í Brussell, Egilsstöðum, Akureyri, Selfossi, Mosó og Reykjavík !

Björn Ingi, Hildur og Ísak Helgi.

Gleðileg jól elskurnar

Kveðja, Inga

Sæl öll sömul!

Gaman að heyra fréttir frá Köben og Egilsstöðum.

Frá Brussel eru bæði skemmtilegar og leiðinlegar fréttir. Við erum núna á fullu að undirbúa flutninga aftur heim á Klakann. Munum pakka niður og flytja heim í lok janúar. Enn eru milljón ófrágengir endar eins og íbúð, pössun fyrir Tobba, hvað þá vinna fyrir mig og fleira, það er ekki einu sinni búið að fastsetja flutningadaga eða kaupa flugmiða... en við verðum amk komin áður en Hrafnkell byrjar að vinna 1. feb. Svo mun ég bara fara í það að leita að dagmömmu fyrir Tobba og vinnu handa mér. Ef þið vitið um eitthvað skemmtilegt endilega látið mig vita.

Í miðju flutningaskipulagsstressinu erum við svo að reyna að undirbúa jólin, nema það gengur hálf brösulega. Strákarnir eru búnir að vera meira og minna veikir í nóv og des og ég lítið komist út úr húsi. Fyrst fengum við hlaupabóluna í heimsókn og sú törn tók 3 vikur... svo var ég sloppin út í nokkra daga en þá kom kvef og hálsbólga og annað slíkt. Frá 1. des hef ég varla farið út!!!! Ég er einmitt algjört jólabarn, elska að skipuleggja gjafirnar, fara í leiðangra og kaupa í pakkana, föndra og baka, pakka gjöfunum inn fínt og allskyns dúllerí, að sjálfsögðu með jólatónlistina í botni. En það hefur farið lítið fyrir slíku fyrir þessi jól enda er ég busy að leika hjúkrunarkonu! Og gjöfunum hefur að mestu verið reddað með aðstoð internetsins og amazon!!!

Jamms.... En febrúar verður partý-mánuður!!!!

P.s. Inga, ég skal hjálpa þér að ná þessum skvísum út að borða... okkur tekst það á endanum!!!!

Hæ. Allt hið besta frá Egilsstöðum. Ég hef reyndar 2x reynt að smala stúlkum Kúbufjölskyldunnar + Ágústu, saman þegar ég hef verið að koma í bæjarferð en það hefur ekki tekist. Best að leyfa einhverjum öðrum að taka það að sér næst ;-)

Annars er ég að fara yfirum í jólaskapi. Held það finnist varla jafnmikil þrítug jólastelpa og ég á Íslandi. Þá er ég ekki að meina bakstur og föndur skreytinga og gjafa ( það kann ég ekki). Heldur meira að sitja og lesa með seríur allt í kringum mig, jólate og piparkökur. Skoða uppskriftarbækur og reyna að ákveða hvað ég á að hafa í matinn á aðfangadag því í ár eru fyrstu jólin sem við verðum heima. Bara við. Og ég get ekki beðið.

Svo verður flogið til Reykjavíkur þann 3. í jólum og viku eytt hjá tengdó.

Þá er kominn janúar 2008 og ekki hægt að segja að það sé minn mánuður. Uppáhaldsmánuðurinn búinn og ekkert nema snjóbylur, kuldi og rútína tekur við. Mér fannst svo leiðinlegt á Egilsstöðum í Janúar og febrúar í fyrra að það munaði engu að ég pakkaði niður og flytti út í heim. Núna verða gerðar ráðstafanir svo það gerist ekki aftur.

Gaman að heyra fréttir frá Köben. Til hamingju með prófin og gangi þér vel með rest.

Hæ Hæ kæru vinir, ekkert að gerast á blogginu okkar :( Skrýtið, en svona er þetta stundum, lítið að frétta og ekkert að segja frá.

Langaði aðeins að láta heyra frá mér í Köben, styttist í jólin og veðrið svona la-la, þó örugglega skömminni skárri en á Íslandinu, þar sem hefur verið kalt, snjór og bylur skv. netinu ;)

Við fjölskyldan erum búin að færa okkur um setur og vorum að flytja síðustu helgi á mun betri stað hér í Köben. Nær skólanum mínum, matvöruverslun hér við hornið, strætó og lestarstöð nánast beint fyrir utan, þannig að við erum á frábærum stað hér í Köbenn, í Fredriksberg fyrir þá sem eru kunnugir borginni, Borups Allé heitir gatan og er íbúðin bara ansi flott og kósý !

Ég er búinn í tveimur kúrsum og prófin gengu bara vel, annað mjög vel og hitt ansi vel - mjög sáttur miðað við fyrstu prófin, og þau munnleg í þokkabót, fyrstu prófin í um 6-7 ár, danirnir ekkert hrifnir af skriflegum prófum, vilja bara drífa þetta af og spjalla í 15-20 mín og málið er dautt !! Er byrjaður í tveimur nýjum kúrsum sem standa yfir fram í lok janúar og þá aftur munnleg próf í þeim, ansi skemmtilegir áfangar reyndar og lýst vel á framhaldið.

Hvað er annars að frétta af ykkur kæru vinir, endilega látið heyra í ykkur, einhverjar fréttir eru góðar fréttir :) Væri gaman ef maður frétti af hitting, partý eða matarboði hjá þó hluta hópsins þannig að "fjölskyldan" væri ekki dauð úr öllum æðum ! Eða sumarbústaðaferð, þær voru nú alltaf frekar skemmtilegar, vel veitt af mat, drykk og öðrum veigum... gaman saman.

Kveðja frá CPH, Björn Ingi.

Okkar maður loksins heiðraður, eins og hann á svo sannarlega skilið !

http://www.happynews.com/news/10172007/ricky-martin-gets-walk-fame-star.htm Livin'la vida loca: http://www.youtube.com/watch?v=HlKocJWE5S4

Kveðja fra Köben.... BIE.

Sælir kæru vinir, langt síðan maður hefur látið vita af sér. Köben er það núna, netið orðið virkt og skólinn byrjaði í lok ágúst. Við fjölskyldan svona rétt að verða búin að koma okkur fyrir. Ísak Helgi litla ljósið okkur stækkar, farinn að skríða á fullu, allir á iði, stekur strákur - eitthvað að flýta sér við allt :) Gaman að því, yndislegur. Tíminn líður hratt og námið á fullu, verkefnin hlaðast upp og styttist í fyrstu prófin. Hérna er árinu skipt upp í fjórar annir þannig að fyrstu lokapróf eru í lok okt. Svo taka við nýir kúrsar. Var í Malmö í dag, við fjögur í einum hópnum, hópaverkefni, skutumst yfir til Svíþjóðar að skoða nokkra staði þar í tengslum við eitt verkefnið. Ekkert mál, lestirnar ganga á 20 mín fresti ! Áhugavert nám og rétt að byrja, líst vel á og hlakka til með framhaldið. Þroskandi að fara aftur í nám, læra upp á nýtt, læra að læra, spennandi - útlönd heilla, en Ísland samt líka, öðruvísi að fylgjast með svona í gegnum netið, að ofan, úr fjarlægð, ekkert að gerast en samt alltaf eitthvað, Yoko ono, Ringo star að kveikja á friðarsúlu, í beinni í Danmörku á tv-2, gaman að því, Villi Vill að halda ræðu í rokinu, allir að frjósa, Ringo gat ekki beðið eftir að komast inn og á barinn !

Erfitt en samt spennandi að verá í landi og borg sem maður kann ekki utan af, mental-mappið samt orðið nokkuð klárt og leiðin í skólann alltaf sú sama. Öðru hvoru breytir maður til og fer nýja leið. Ekkert mál, borgin ekki eins stór og virðist í fyrstu, kortið blekkir - maður hjólar og eftir stutta stund er maður kominn á leiðarenda. Hér fer maður allt á hjóli, labbandi eða í lest. Bíllinn er bull. Bíllinn er vesen. Vorum á bíl hér fyrstu 10 dagana og satt best að segja var maður feginn að skila Hertz bílaleigubílnum inn. Umferðin er ekki skemmtileg, hún er leiðinleg, hún er vesen, maður fer hægt yfir og hjólin taka fram úr. Þau eiga réttinn, alltaf að líta til hægri, ef ekki keyrir maður á hjól, það væri ekki spenanndi, bara vesen, vesen eru slæm og ekki til framdráttar ;)

Inga mín, innilega til hamingju með brúðkaupið, hrikalega hefði verið gaman að slást í för með kúbuliðinu og djamma, samfagna og skála ! Ég trúi varla að 10 ár séu liðin, tíminn líður, við eldumst (samt ekki) - allir hafa það gott, við búum á mismuandi stöðum, Kaupmannahöfn, Brussell, Egilsstaðir, Akureyri, Selfoss, Mosó og Reykjavík - svo lík öll en samt svo fjarlæg :) Svona er lífið, gaman að þessu.... við höfum hitting e-h tímann þar sem við öll getum hist, það væri frábært og tímabært, kemur að því - ekkert liggur á, við erum ung (þó þrítug og rúmlega séum), ung í anda og líkama... komin með börn og burur, erfingja, stelpur, strákar, sum gift önnur ógift, allt í gangi. Öll við góða heilsu, skemmtileg og sæt... hvað er mikilvægara, ég bara spyr ?

Eins og Inga nefndi man ég eins og það hefði gerst í gær þegar við sátum í aðalbyggingu HÍ hjá Önnu Dóru Sæþórs, og vorum að kynnast, fyrstu tímarnir, stressandi, hvað á maður að gera, hvað á maður að segja, hvað er maður að gera í landafræði... hvað er landafræði annars? Á maður eitthvað sameiginlegt með þessu fólki, hvað er ég að gera hér ????? hehe, skrýtið, svo er þetta bara gaman, skemmtilegt fólk, áhugavert nám, skemmtilegur félagsskapur, frábærar námsferðir, fólk kynnist, fer að þekkjast, kúbufjölskyldan verður til... gæti það verið betra síðan, dinnerar, djamm, pottapartý, bústaðarferðir, ekki slæmt eftir 10 ár. Eins og Inga nefndi þá á örugglega ekki eins mikið eftir að gerast á næstu 1o árum og þeim 10 síðustu. Hver veit samt.

Kæru vinir, langaði að bara aðeins að láta frétta af mér og mínum, bið að heilsa ykkur öllum, verið dugleg að skrifa, hittast, spjalla, láta vita af ykkur og ykkar högum, alltaf gaman að fylgjast með að utan, heiman hvaðan sem er. MSN er sniðugt, bið að heilsa, gangi ykkur öllum sem best, kv. BIE :)

Gaman að heyra frá ykkur :)
Það eru semsagt 10 ár ..hmm.... mér finnst líka langt síðan. Er búin að eiga 2 krakka, búa í Danmörku, taka masterspróf, gifta mig, flytja átta sinnum, heimsækja ca 75 vatnshæðarmæla, borða krókódíl, kaupa mér hús og jeppa, tala næstum því kínversku og fara í meira en 50 parý með ykkur.
Við ættum að halda uppá að við hittumst fyrir 10 árum, borða mat og dansa :) Eruð þið með hugmyndir um hvar og hvenær er best að hittast? Reyna að ná sem flestum. Það er svo gaman.

ég er greinilega alltof löt við að skrifa hérna inn því að ég gleymi alltaf passwordinu mínu. Þetta er náttúrulega ekki hægt.

Allt fínt að frétta af mér, náði öllum prófum í sumarkúrsunum og er bara á fullu að vinna, læra og hugsa um heimilið. Engar stórfréttir á ferðinni á þessum bæ.

Inga, til hamingju með afmælið á morgun (er það ekki rétt hjá mér). Mér líst rosalega vel á að hittast öll sem fyrst.

Það eru 10 ár síðan ég flutti til Reykjavíkur og fór í háskólann en mér finnst vera heil eilífð síðan. Þá var ég 19 ára og var að skríða í þrítugsaldurinn eftir nokkra daga. Í dag er ég 29 ára og er að skríða inn í fertugsaldurinn eftir nokkra daga. Þetta eru búin að vera frekar merkileg 10 ár því mér finnst ég vera búin að afreka heil ósköp. Ég efast um að ég eigi nokkurn tíman eftir að afreka eins mikið á jafn stuttum tíma.

Miðað við hvað ég man lítið eftir því sem ég lærði í háskólanum, þá er merkilegt hvað ég man vel eftir því þegar ég sá ykkur fyrst, hvert og eitt. Enda löngu búin að gera mér grein fyrir því að starfsmannamál henta mér betur en landfræðin.

Mér finnst þetta gott tilefni til að hittast: 10 ár síðan við kynntumst og ég er að verða þrítug? (Sorrý þið sem eigið líka afmæli í kring, ég er bara svo sjálfhverf og ég nenni ekki að fletta afmælisdögum upp í þjóðskrá - læt ykkur bara vita af mínum).

það er orðið alltof langt síðan ég dansaði í stofunni......................

Hehe, allar sögur úr brúðkaupinu hljóma ekkert smá skemmtilega.

Inga, fall er fararheill... en svona litlar uppákomur krydda nú bara athöfnina.

Og einhvern vegin kemur mér ekkert á óvart að talsmenn Kúbufamilíunnar hafi djammað manna lengst... sé einhvern vegin alveg fyrir mér Stebbu/Mörtu sitjandi á tröppunum drekkandi rauðvín af stút þegar allir hinir voru að fara..... humm....

Hlakka til að sjá fleiri myndir ;-)

Ég get sko alveg lofað ykkur að ég verð búin að færa mig yfir á Klakann innan árs, sakna ykkar svo voðalega mikið!!!!
Og ég hef verið að dusta rykið af kokteilabókunum... Síðan sólin lét sjá sig aftur í Brussel og myntuplantan mín dafnar svo vel í garðinum, hef ég verið að kokka upp killer-mojitos í fordrykk út á terrössu! Algjör sæla!!! Svo kokteila-uppskriftirnar hafa ekkert gleymst....

Við skemmtum okkur konunglega í brúðkaupinu hjá Frú Ingibjörgu. Hún sjálf var auðvitað alveg æði eins og þið sjáið á myndinni.
Við Marta vorum ekki neitt æði í flugvélinni daginn eftir, frekar grænar í framan og flugvélin hristist alltof mikið.
Þetta var alveg frábært sveitabrúðkaup og Inga og Halli eiga æðislega fjölskyldu og vini (VIÐ auðvitað samt alltaf best).
Böddi, þú ert vonandi búinn að koma þér vel fyrir í Köben!
Mér líst vel á hitting 7.september þegar Lille Bro mætir á landið, eruð þið til?
Svo ætla ég rétt að vona að Bjössi hafi tekið framúr öllum í maraþoninu og Hildur hafi rúllað upp prófinu. Vonandi er Eddie búinn að ná sér eftir skrallið á okkur kerlingunum. En við erum svosem að ná heilsu aftur, þannig að Ella....þú þarft að ryfja upp úr kokteilabókinni þinni og flytja heim til Íslands aftur.

Ég stal þessarri af síðunni hans Tryggva. Ég er varla neina mynd búin að sjá nema þær sem eru þar svo þetta verður að duga í bili. Það bjargar myndinni að Eddie reyndi að komast inn..........

Elsku Inga!

Innilega til hamingju með giftinguna, daginn og allt saman!

Þú mátt alveg smella eins og einni mynd inn af ykkur HJÓNUNUM!!!